ஒடிஸி நடனம் பயில்பவர்களுக்கு உதவித்தொகை வழங்குகிறது நால்கோ!!

சென்னை: கிளாஸிக்கல் நடனமான ஒடிஸி நடனம் பயில்பவர்களுக்கு உதவித்தொகையை பொதுத்துறை நிறுவனமான நேஷனல் அலுமினியம் கம்பெனி(நால்கோ) வழங்கவுள்ளது.

இந்த நிறுவனம் ஒடிஸா மாநிலத்தில் இயங்கி வருகிறது. ஒடிஸி நடனம் பயிலும் மாணவ, மாணவிகளுக்கு உதவித்தொகையை நால்கோ வழங்கவுள்ளது. இத்தகவலை நால்கோ நிறுவனத்தின் தலைவரும், நிர்வாக இயக்குநருமான டி.கே. சந்த் தெரிவித்தார்.

அவர் மேலும் கூறியதாவது: ஒடிஸாவின் உயரிய கலாசாரமான ஒடிஸி நடனத்தைக் கட்டிக் காப்பதிலும், அதை பிரபலப்படுத்துவதிலும் நால்கோ ஈடுபடவுள்ளது. அதற்காக ஒடிஸி நடனம் பயிலும் மாணவ, மாணவிகளுக்கு உதவித்தொகையை வழங்கவுள்ளது. வறுமைக்கோட்டுக்குக் கீழே வாழும் மாணவர்களுக்கு இந்த உதவித்தொகை வழங்கப்படும் என்றார் அவர்.

இதுதொடர்பான கூடுதல் விவரங்களை http://www.c-tempo.org என்ற இணையதளத்தில் காணலாம்.