40 என்ஜீனியரிங் கல்லூரிகளில் 3 ஆயிரம் இடங்களை ரத்து செய்ய முடிவு..!

வேலை வாய்ப்பு குறைவு

இதன் காரணமாக அண்ணாபல்கலைக்கழகம் கடந்த ஆண்டு நடத்திய கலந்தாய்வு மூலம் சில என்ஜீனியரிங் கல்லூரிகளில் 10 அல்லது 20 இடங்கள் மட்டுமே நிரம்பின. இந்த குறைவான மாணவர்களை கொண்டு கல்லூரி நடத்துவது கடினம். மேலும் ஒவ்வொரு வருடமும் வேலைவாய்ப்பும் குறைந்து வருகிறது.

மாணவர்கள் திணறல்

அதன் காரணமாக இந்த வருடம் ஏராளமான மாணவ மாணவிகள் கலை, அறிவியல் கல்லூரிகளில் சேரும் நிலை ஏற்பட்டு உள்ளது. மருத்துவ கல்விக்கு நீட் தேர்வு காரணமாக பிளஸ்2 மதிப்பெண் அடிப்படையில் மாணவர் சேர்க்கை இல்லை என்ற நிலை உள்ளது. நீட் தேர்வு முடிவு வெளியாவதிலும் தாமதம் ஆகிறது. இதனால் மருத்துவம், என்ஜீனியரிங் இரண்டுக்கும் விண்ணப்பிக்க உள்ள மாணவர்கள் எந்த படிப்பில் சேரலாம் என்று முடிவு எடுக்க திணறி வருகிறார்கள்.

என்ஜீனியரிங் கல்லூரிகள் மூடல்

பல என்ஜீனியரிங் கல்லூரிகளில் கடந்த சில ஆண்டுகளாக மாணவர்கள் போதிய அளவில் சேராததால் கடந்த ஆண்டு 22 கல்லூரிகள் மூடுவதற்கு விண்ணப்பித்தன. இந்த வருடமும் 5 என்ஜீனியரிங் கல்லூரிகள் மூடுவதற்கு விண்ணப்பித்துள்ளன.

3000 ஐ.டி. இடங்கள்

இது தவிர இந்த ஆண்டு 47 என்ஜீனியரிங் கல்லூரிகள் பி.இ., எம்.இ. படிப்புகள் பலவற்றை ரத்து செய்து அனுமதி கேட்டு அண்ணா பல்கலைக்கழகத்திற்கும், ஏ.ஐ.சி.டி.இக்கும் விண்ணப்பித்துள்ளன. அவற்றில் 40 கல்லூரிகள் தகவல் தொழில்நுட்பம் (ஐ.டி) பிரிவில் மட்டும் 3 ஆயிரம் இடங்களை ரத்து செய்வதற்கு அனுமதி கோரி விண்ணப்பித்துள்ளன. ஆயிரம் இடங்கள் மற்ற பிரிவுகளில் உள்ளவை.