இளநிலை உதவியாளர் பணியிடங்கள் நாளை கலந்தாய்வு தொடக்கம்!!

சென்னை: இளநிலை உதவியாளர் பணியிடங்களுக்காக நாளை(ஜனவரி 30) கலந்தாய்வு நடத்தப்படவுள்ளது.

தமிழ்நாடு பள்ளிக் கல்வித் துறையில் 98 இளநிலை உதவியாளர் பணியிடங்கள் காலியாக இருந்தன. இந்தப் பணியிடங்களுக்காக தமிழ்நாடு அரசுப் பணியாளர் தேர்வாணையம் (டி.என்.பி.எஸ்.சி) சார்பில் நடத்தப்பட்ட குரூப்-4 தேர்வில் தகுதி பெற்றவர்களுக்கு நாளை(ஜன.30) பணி நியமனத்துக்கான கலந்தாய்வு நடத்தப்பட உள்ளது.

தமிழ்நாடு பெற்றோர் ஆசிரியர் கழகம், சென்னை-6 என்ற முகவரியில் நாளை பிற்பகல் 2 மணிக்கு நடைபெறும் இந்த கலந்தாய்வில் பங்கேற்க வரும் தகுதி பெற்றவர்கள், தேர்வாணையத்திலிருந்து பெறப்பட்ட அறிவிப்பு கடிதத்தையும், தேர்வு நுழைவுச் சீட்டையும் எடுத்து வரவேண்டும்.

பள்ளிக் கல்வித் துறை வெளியிட்டுள்ள செய்திக்குறிப்பில் இத்தகவல் தெரிவிக்கப்பட்டுள்ளது.