பி.எட்.விண்ணப்ப விற்பனை படுஜோர்... செப்டம்பர் 28 முதல் கவுன்சிலிங்!!

சென்னை: பி.எட். மாணவர் சேர்க்கை கவுன்சிலிங்குக்கான விண்ணப்ப விற்பனை படுஜோராக நடந்துள்ளது. கவுன்சிலிங்குக்காக 7 ஆயிரத்துக்கும் மேற்பட்டோர் விண்ணப்பம் செய்துள்ளனர்.

தமிழகம் முழுவதும் உள்ள 21 அரசு மற்றும் அரசு நிதியுதவி பெறும் கல்வியியல் கல்லூரிகளில் 2 ஆயிரத்துக்கும் அதிகமான பி.எட். இடங்கள் உள்ளன. இந்த இடங்களுக்கு 2015-16 கல்வியாண்டில் மாணவர் சேர்க்கைக்கான கவுன்சிலிங்கை விலிங்டன் சீமாட்டி கல்வியியல் மேம்பாட்டு நிறுவனம் நடத்துகிறது.

வருகிற 28-ஆம் தேதி தொடங்கி அக்டோபர் 5-ஆம் தேதி வரை 6 நாள்கள் கவுன்சிலிங் நடத்தப்படும்.

இதற்கான விண்ணப்பம் செப்டம்பர் 3 முதல் 10-ம் தேதி வரை விற்பனை செய்யப்பட்டன. சுமார் 8 ஆயிரம் விண்ணப்பங்கள் படுஜோராக விற்பனையாயின.

விண்ணப்பங்களை நேற்று(செப்டம்பர் 11) மாலைக்குள் சமர்ப்பிக்கவேண்டும் என அறிவுறுத்தப்பட்டிருந்தது. இதையடுத்து நேற்று மாலை 7 ஆயிரத்துக்கும் அதிகமானோர் விண்ணப்பங்களை சமர்ப்பித்துவிட்டனர்.

அவர்களுக்கு தபால் மூலம் கவுன்சிலிங்குக்கு அழைப்புக் கடிதங்கள் அனுப்பப்படும்.

இதுதொடர்பாக இதுகுறித்து பி.எட். மாணவர் சேர்க்கை செயலர் ஆர். பாரதி கூறியதாவது:

பி.எட். சேர்க்கைக்கு விண்ணப்பிக்க கால அவகாசம் முடிந்துவிட்ட நிலையில், தபால் மூலம் வந்து சேர்ந்துள்ள விண்ணப்பங்களை சேகரிக்கும் பணிகள் நடைபெற்று வருகின்றன. சுமார் 7 ஆயிரம் விண்ணப்பங்கள் வந்துள்ளன.

விண்ணப்பித்த மாணவர்ளின் விண்ணப்பங்களை பரிசீலனை செய்து அவர்களுக்கு செப்டம்பர் 16 முதல் அழைப்புக் கடிதங்கள் அனுப்பப்படும். மேலும் அவர்களுக்கு எஸ்.எம்.எஸ்.மூலம் தகவல் அனுப்பப்படும். கல்லூரி இணையதளத்தில் மாணவர்களுக்கு தேவையான விவரங்கள் வெளியிடப்படும் என்றார் அவர்.