கர்நாடகாவில் பியூசி 2-ம் ஆண்டு வேதியியல் வினாத்தாள் லீக்கானது: அதிகாரிகள் அதிர்ச்சி!!

புதுடெல்லி: கர்நாடக மாநிலத்தில் பியூசி 2-ம் ஆண்டு வேதியியல் பாட வினாத்தாள் லீக்கானது. இதனால் சம்பந்தப்பட்ட கல்வித்துறை அதிகாரிகள் அதிர்ச்சி அடைந்துள்ளனர்.

கர்நாடக மாநிலத்தில் பியூசி 2-ம் ஆண்டு(பிளஸ் 1, பிளஸ் 2-க்கு பதிலாக கர்நாடகாவில் பியூசி முதலாம், 2-ம் ஆண்டு) தேர்வு நடைபெற்று வருகிறது. இந்த நிலையில் நேற்று நடைபெறவிருந்த வேதியியல் பாட வினாத்தாள் லீக்கானது.

இதனால் பியூசி கல்வித்துறை அதிகாரிகள் அதிர்ச்சி அடைந்தனர்.

இதன் எதிரொலியாக தேர்வை சம்பந்தப்பட்ட அதிகாரிகள் ரத்து செய்துவிட்டனர். இதுகுறித்து பியூசி துறை இயக்குநர் பல்லவி அக்ருதி கூறியதாவது:

1.74 லட்சம் பேர் அறிவியல் துறைக்கான தேர்வை எழுதவிருந்தனர். இந்த நிலையில் வேதியியல் பாட வினாத்தாள் லீக்கானது எங்களை அதிர்ச்சி அடையச் செய்துள்ளது. இதைத் தொடர்ந்து தேர்வை ரத்து செய்துவிட்டோம்.

மறுதேர்வுக்கான தேதியை விரைவில் அறிவிப்போம். இதுதொடர்பாக துறை விசாரணை நடத்த உத்தரவிடப்பட்டுள்ளது என்றார் அவர்.

பெல்லாரி மாவட்டத்திலுள்ள மகளிர் கல்லூரி தேர்வு மையத்திலிருந்து வினாத்தாள் வெளியானதாக ஆரம்பக்கட்ட விசாரணையில் தெரியவந்துள்ளது.