11 ஆம் வகுப்பில் கணிதத்தை கைவிடுவது எதிர்காலத்தை பாதிக்குமா?

மாணவர்கள் சிலருக்கு கணக்குப் பாடம் என்பது மிகவும் எளிது. அந்தப் பாடத்தை பயில மிகவும் ஆர்வம் காட்டுவர். ஆனால் வேறு சில மாணவர்களுக்கோ கணிதப் பாடம் என்றால் பயம். ஒரு மிரட்சி. கணக்குப் பாடம் என்றாலே அவர்களுக்கு எட்டிக்காயாக கசக்கும்.

எனவே, 10-ஆம் வகுப்பில் இருந்து 11-ஆம் வகுப்புக்கு செல்லும் லட்சக்கணக்கான மாணவர்கள், கணிதத்தை தங்களது பாடப் பட்டியலில் வைக்க வேண்டுமா அல்லது முற்றிலுமாக கைவிட்டு விடலாமா என்ற குழப்பத்திலேயே செல்கின்றனர்.

கணிதத்தை அதிகம் விரும்பாத மாணவர்களில் நீங்கள் இருந்தால், கணிதத்தை விட்டு வெளியேறுவது உங்கள் வாழ்க்கைக்கு தீங்கு விளைவிக்குமா என்று யோசித்தால், நீங்கள் சரியான இடத்தில் இருக்கிறீர்கள் என்று அர்த்தம். கணிதம் எப்போது, எங்கு தேவைப்படுகிறது, நீங்கள் கணிதத்தை விட்டு வெளியேறக்கூடிய சூழ்நிலைகள் மற்றும் உங்கள் வாழ்க்கைக்கு அது எவ்வளவு முக்கியம் என்பதைப் புரிந்துகொள்ள இதைத் தொடர்ந்து படிக்கலாம். கணிதம் எவ்வளவு முக்கியமான பாடம் என்பதை இதன்மூலம் உங்களுக்கு புரிய வைக்க முடியும்.

1. ஏன் கணிதம் அவசியமாகிறது?

12- ஆம் வகுப்பில் கணிதம் ஒரு தகுதி அளவுகோலாகக் குறிப்பிடப்பட்ட சில படிப்புகள் மற்றும் வேலைவாய்ப்புகள் உள்ளன. இவற்றில் ஏதேனும் ஒன்றை பயில நீங்கள் திட்டமிட்டால், நீங்கள் கணிதத்தை விட்டு வெளியேறவே முடியாது.

கணிதப் பாடம் இன்றியமையாத சில தொழில் வாய்ப்புகள் மற்றும் படிப்புகளின் பட்டியல் கீழே தரப்பட்டுள்ளது:

என்ஜினீயரிங்

பொறியியல் படிப்பைத் தொடர்வதற்கும் நுழைவுத் தேர்வுகளுக்கு (JEE பிரதானத் தேர்வு), BITSAT, VITEEE போன்றவை) விண்ணப்பிப்பதற்கும் அடிப்படைத் தகுதி உங்களின் 12-ஆம் வகுப்பில் இயற்பியல், வேதியியல் மற்றும் கணிதப் பாட மதிப்பெண்கள் ஆகும். நீங்கள் ஏதேனும் ஒரு பல்கலைக்கழகத்தில் பி.இ./பி.டெக் (B.E/B.Tech) படிப்பில் சேர விரும்பினால், கணிதம் (மற்றும் அறிவியல்) அவசியமாகிறது.

தூய மற்றும் இயற்பியல் அறிவியல்

இயற்பியல் பாடம் என்பது ஒரு பரந்த களமாக அமைந்துள்ளது. இதில் வானியல் (வானியல் பற்றிய ஆய்வு), வானிலையியல் (காலநிலை மற்றும் வளிமண்டலம் பற்றிய ஆய்வுப்படிப்பு), புவியியல் (பூமியின் இயற்பியல் பண்புகளை ஆய்வு செய்யும் களம்) போன்ற பல சிறப்புகள் அடங்கும். இது தவிர, மாணவர்கள் தூய அறிவியல் (பியூர் சயின்ஸ்), அதாவது இயற்பியல் மற்றும் வேதியியல் பட்டப்படிப்புகளுக்குச் செல்லலாம், இது தூய மற்றும் பயன்பாட்டு ஆராய்ச்சித் துறைகளில் வழிகளைறக்கும். இந்தத் துறைகள் அனைத்துக்கும் தகுதித் தேவையாக கணிதப் பாடம் உள்ளது என்பதை மாணவர்கள் மறக்கக்கூடாது.

மெர்ச்சன்ட் நேவி

ஒரு நாட்டிலிருந்து மற்றொரு நாட்டுக்கு சரக்குகளை ஏற்றிச் செல்லும் வணிகக் கடற்படைக் கப்பல்களின் செயல்பாட்டை நிர்வகிப்பதற்கு மெர்ச்சன்ட் நேவி அதிகாரிகளின் பொறுப்பாகும். அவர்களின் பொறுப்புகள் ஒட்டுமொத்த பராமரிப்பு முதல் கப்பலின் தொழில்நுட்ப செயல்பாட்டை கவனிப்பது வரை மாறுபடும். நீங்கள் பி.எஸ்சி (கடல் அறிவியல்) படிப்பு படித்து விட்டு கப்பலில் பராமரிப்புப் பணிகளில் சேர முடியும். அதேபோல் பி.டெக் படிப்பதன் மூலம் கப்பல்துறையில் பொறியியலாளராக முடியும். இந்தப் படிப்பைப் படிக்கும்போது நீங்கள், இயற்பியல், வேதியியல் மற்றும் கணிதப் பாடங்களை எந்த நிலையிலும் தவிர்க்கவே முடியாது.

கட்டிடக்கலை

கட்டிடக்கலை படிப்புகள் (B.Arch) பயில இரண்டு முக்கிய நுழைவுத் தேர்வுகள் மூலம் சேர்க்கை பெறுகின்றன. நேட்டா (NATA) அல்லது ஜேஇஇ(JEE) முதன்மை (தாள் 2).
இந்த 2 நுழைவுத் தேர்வுகளுக்கும், கணிதப் பாடம் கட்டாயம். இயற்கணிதம், முக்கோணவியல் மற்றும் கால்குலஸ் ஆகியவை கட்டிடங்களின் வடிவமைப்பில் இன்றியமையாதவை என்பதால், நீங்கள் கணிதத்தைத் தவிர்க்க முடியாது. கட்டிடக் கலைஞர்கள் கட்டமைப்பு சிக்கல்களை பகுப்பாய்வு செய்ய எண்களைப் பயன்படுத்துகின்றனர்; எனவே உங்களுக்கு கணிதத்தில் வலுவான நிபுணத்துவம் தேவைப்படும். எனவே, இந்தப் படிப்புகளைப் பயிலவும் கணிதப் பாடம் முக்கியமானதாக அமைகிறது.

பொருளாதாரம்

பொருளாதாரம் ஒரு சமூக அறிவியல் என்ற உண்மையைக் கருத்தில் கொண்டு, நிறைய மாணவர்கள் பொருளாதாரம் முற்றிலும் தத்துவயியல் பாடம் என்ற தவறான கருத்தைக் கொண்டுள்ளனர். பொருளாதாரம் தொடர்பான பாடங்களுக்கும் கணிதப் பாடம் இன்றியமையாததாகும். பொருளாதாரக் கோட்பாடுகள் மற்றும் ஆராய்ச்சி எண்கள் மற்றும் தரவுகளை அதிக அளவில் பயன்படுத்துவதால், கணிதப் பாடம் முக்கியமானது. பி.ஏ. பொருளாதாரம் பயில, பெரும்பாலான பல்கலைக்கழகங்கள் 12-ஆம் வகுப்பில் கணிதத்தைக் கேட்பதால் நீங்கள் அதை பள்ளியில் மாணவர்கள் தவிர்க்க முடியாது.

மேலாண்மை (இளங்கலை நிலை அளவில்)

எந்தவொரு பாடம் படித்தாலும் மேலாண்மை பிரிவில் உயர்கல்வி பயிலலாம் என்ற நிலை இருந்தாலும், சில கல்லூரிகளில் கணிதப் பாடத்தை 12-ம் வகுப்பில் படித்துள்ளீர்களா என்று கேட்கிறார்கள். 12-ஆம் வகுப்பில் கணிதம் இல்லையென்றால் நீங்கள் இந்தக் கல்லூரிகளில் சேர முடியாது. ஷாஹீத் சுக்தேவ் வணிக ஆய்வுக் கல்லூரி (BMS), என்எம்ஐஎம்எஸ் (NMIMS) பல்கலைக்கழகம் (BBA) மற்றும் IIM இந்தூர் (ஒருங்கிணைந்த BBA-MBA) ஆகியவை இதில் அடங்கும். நீங்கள் 12-ஆம் வகுப்பில் கணிதப் பாடத்தைப் படிக்கவில்லை என்றால் அவர்களின் நுழைவுத் தேர்வு எழுத கூட உங்களை அனுமதிக்கமாட்டார்கள்.

இவை தவிர, கணிதம் தேவைப்படும் மேலும் இரண்டு தொழில் படிப்புகள் உள்ளன; இவை ஏவியேஷன் (பைலட், ஏர் டிராஃபிக் கன்ட்ரோலர் போன்றவை) மற்றும் கம்ப்யூட்டர் அப்ளிகேஷன்ஸ் (BCA) படிப்புகள் ஆகியவை அந்த 2படிப்புகள்.

2. எப்போது எங்கு கணிதப் பாடம் பரிந்துரைக்கப்படுகிறது, ஆனால் கட்டாயம் இல்லை?

கணிதப் பாடம் கட்டாயம் அல்லாத படிப்புகள் ஏராளமாக உள்ளன. அந்தப் படிப்புகளுக்கு கணிதம் ஒரு தகுதி அளவுகோலாக குறிப்பிடப்படுவதில்லை. ஆனாலும், அந்தப் படிப்புகள் எண்களை மையமாகக் கொண்டவை, மேலும் கணிதத்தில் அடிப்படை இல்லாமல் அவற்றைப் பின்தொடர்வதில் நீங்கள் சிரமத்தை எதிர்கொள்ளலாம். அந்தப் படிப்புகள் என்னென்ன என்பதைப் பார்ப்போம்....

உண்மையான அறிவியல்

தரவுகளை பகுப்பாய்வு செய்தல், புள்ளிவிவரங்களை விளக்குதல் ஆகியவை ஆக்சுவரி (உண்மையான அறிவியல்) படிப்புகளின் ஒரு பகுதியாகும். காப்பீட்டுக் கொள்கைகளை வடிவமைத்து, திறமையான முதலீடுகளைக் கொண்ட நிறுவனங்களுக்கு உதவுவதோடு, வங்கி, சுகாதாரம் மற்றும் காப்பீடு போன்ற பல்வேறு உயர்-ஆபத்துத் துறைகளில் உள்ள அபாயத்தைக் கணக்கிடும் வல்லுநர்கள் ஆக்சுவரீஸ் ஆவார்கள். எண்கள் மற்றும் கணிதத்தை விரும்புவோருக்கு மட்டுமே இந்தத் துறை பொருத்தமானதாக இருக்கும்.

எனவே 11 மற்றும் 12 ஆம் வகுப்பில் கணிதத்தைத் தேர்ந்தெடுப்பது உங்கள் உயர்கல்வி வாழ்க்கையை எளிதாக்கும்.

நிதி & வங்கி

நிதி மற்றும் வங்கித் துறையில் உள்ள தொழில்கள் அனைத்தும் உங்களிடமுள்ள செல்வத்தின் நிர்வாகத்துடன் தொடர்புடையவை. மேலும், அவை முதலீட்டு வங்கியாளர், நிதித் திட்டமிடுபவர், நிதி ஆய்வாளர், தணிக்கையாளர், வர்த்தகர் போன்றவள்ளைஉள்ளடக்கியிருக்கலாம். இந்தத் துறைகளில் ஒரு தொழிலைத் தொடர, நீங்கள் கணிதத்தில் மேதையாக இருக்க வேண்டிய அவசியமில்லை. இருப்பினும், கணிதத்தில் ஓரளவுக்கு நிபுணத்துவம் கண்டிப்பாக தேவை. புள்ளியியல் அறிவு மற்றும் பகுப்பாய்வு திறன் அவசியம், எனவே 12 ஆம் வகுப்பு வரை கணிதம் கட்டாயம் இல்லாவிட்டாலும் பயனுள்ளதாக இருக்கும்.

3. நீங்கள் எப்போது கணிதப் பாடத்தை முற்றிலுமாக நீக்கலாம்?

சில தொழில், படிப்புகளுக்கு கணிதம் முக்கியமானதாக இருக்கலாம், ஆனால் அது அனைவருக்கும் அவசியமில்லை. உங்கள் 12 -ஆம் வகுப்பில் கணிதம் படிக்காமல் நீங்கள் தொடரக்கூடிய பல்வேறு தொழில் வாய்ப்புகள் உள்ளன. அவை குறித்து இங்கே பார்க்கலாம்..

கணிதம் இல்லாத வணிகம்

கணிதம் இல்லாத வணிகப் படிப்புகள் நிறைய தொழில் வாய்ப்புகளை வழங்காது என்று பொதுவான நம்பிக்கை உங்களுக்குச் சொல்லப்படுகிறது. ஆனால் அது அப்படி இல்லை. பட்டய கணக்காளர் (CA), கம்பெனி செகரெட்டரி (CS), கார்ப்பரேட் சட்டம், ஸ்டாக் புரோக்கிங் ஆகியவை மிக உயர்ந்த அளவிலான கணக்கீடுகளை உள்ளடக்காத சில தொழில் படிப்புகளை, 12-ஆம் வகுப்பில் கணிதம் இல்லாமல் தொடர முடியும். B.Com மற்றும் BBA போன்ற படிப்புகளும் உங்களுக்கான படிப்புகளுக்கு கதவுகளைத் திறந்தே வைத்திருக்கின்றன. இவற்றுக்கும் கணிதம் தேவையில்லை.

கணிதம் இல்லாத அறிவியல் படிப்புகள்

அறிவியல் படிப்பு உங்களுக்கு ஆர்வமாக இருந்தாலும், கணிதப் படிப்பு உங்களுக்குத் தேவையில்லை. நீங்கள் கணிதத்திற்குப் பதிலாக உயிரியலைப் படிக்கலாம். இயற்பியல், வேதியியல், பயாலாஜி என் அழைக்கப்படும் PCB ஸ்டிரீம் பாடங்களானது உங்களுக்காக மருத்துவம், அதனுடன் இணைந்த மருத்துவம், உளவியல், உயிரியல் மற்றும் வாழ்க்கை அறிவியல் போன்றவற்றில் பலவிதமான தொழில் வாய்ப்புகளைத் திறந்து வைத்துள்ளது. சில மாணவர்கள் கணிதம் மற்றும் உயிரியல் இரண்டையும் தேர்வு செய்து படிக்கின்றனர். ஆனால் அதை பெரும்பாலானோர் விரும்புவதில்லை. அதை பரிந்துரை செய்வதும் இல்லை. அவற்றை ஒன்றாக சமநிலைப்படுத்துவது கடினம். அதேபோல் மருத்துவப் படிப்புகளில் சேர உதவும் நீட் தேர்வுக்கு கணிதமும் கட்டாயமில்லை.

கணிதம் இல்லாத மனிதநேயம்

ஒட்டுமொத்த மனிதநேய ஸ்டிரீம் படிப்புகளுக்கு உண்மையில் கணிதம் தேவையில்லை. மேலும் தொல்லியல், அருங்காட்சியகம், வாழ்விடக் கொள்கை மற்றும் பயிற்சி, ஜெரண்டாலஜி, ஊரகப்புற ஆய்வுகள், சர்வதேச உறவுகள் மற்றும் பல உட்பட பல்வேறு படிப்புகளுக்கு கணிதப் பாடம் தேவையில்லை. இந்தப் படிப்புகள் நல்ல ஊதியத்துடன் கூடிய வேலைவாய்ப்புகளை வழங்குகின்றன.

எந்த பாடத்துடனும்....

நீங்கள் எந்த பாடத்தின் சேர்க்கையுடன் தொடரக்கூடிய பல தொழில்கள் மற்றும் படிப்புகள் கொட்டிக் கிடக்கின்றன. மேலும் இவற்றில் ஏதேனும் ஒன்றில் நீங்கள் ஆர்வமாக இருந்தால், உங்கள் பாடத் தேர்வு பட்டியலில் இருந்து கணிதத்தை நீக்கி விட முடியும்.
மாஸ் கம்யூனிகேஷன், இதழியல், வடிவமைப்பு, உளவியல், சந்தைப்படுத்துதல்/விளம்பரம், புகைப்படம் எடுத்தல், சமூக சேவை, ஹோட்டல் மேலாண்மை, நிகழ்வு மேலாண்மை, சட்டம், சிவில் சேவைகள் மற்றும் வரவிருக்கும் புதிய தொழில்படிப்பு விருப்பங்களான சொகுசு பிராண்ட் மேலாண்மை, விளையாட்டு மேலாண்மை, அனிமேஷன் மற்றும் கிராபிக்ஸ் போன்றவை அந்தப் பாடங்களில் அடங்கியுள்ளன.

ஒரு வெற்றிகரமான வேலை, வாழ்க்கைக்கு கணிதம் இன்றியமையாத பாடமா?

கணிதம் முக்கியமான பாடம், 12ம் வகுப்பு வரை படிக்க வேண்டும் என்று பெற்றோர்கள், உறவினர்கள், நண்பர்கள் சொல்வதைக் கேட்டிருப்பீர்கள். இந்தக் கூற்றில் ஓரளவு உண்மை இருக்கிறது.

கணிதம் மிக முக்கியமான பாடம்தான். அதில் எந்தவித சந்தேகமும் இல்லை. அதைப் பயில்வது அவசியமும் கூட. கணிதம் தர்க்கரீதியான மற்றும் பகுப்பாய்வு பகுத்தறிவு திறன்களை உருவாக்குகிறது, இது எண்கள் தொடர்பான வேலைகளில் மட்டுமல்ல, பொதுவான திறனை வளர்ப்பதற்கும் உதவும் என்பதை மாணவர்கள் மறந்துவிடக்கூடாது.

ஒரு குறிப்பிட்ட கணித சிக்கலை நாம் தீர்க்கும் போதெல்லாம், அதை சிறிய பகுதிகளாகப் பிரித்து, உறவுகளை கவனமாகக் கவனித்து, தர்க்கரீதியான தீர்வுகளைக் கொண்டு வர முயற்சிக்கிறோம். இது மாணவர்களின் பகுத்தறியும் திறனைக் கூர்மைப்படுத்த உதவுகிறது. இதைக் கருத்தில் கொண்டு, பெரும்பாலான நுழைவுத் தேர்வுகள் உங்கள் தகுதியின் அளவுகாட்டியாக உங்கள் அளவு திறன்களை மதிப்பிடுகின்றன. எனவே, கணிதப் பாடத்தைப் பயில்வது அனைத்துக்குமே சிறந்ததாக இருக்கும்.

எவ்வாறாயினும், 10 ஆம் வகுப்பு வரை ஏற்கனவே கட்டமைக்கப்பட்ட உங்கள் கணிதத் திறனை இவை மதிப்பிடுகின்றன. உங்கள் அடிப்படை வலுவாகவும், உங்கள் கருத்துக்கள் தெளிவாகவும் இருந்தால், நீங்கள் 12-ஆம் வகுப்பில் கணிதம் படிக்காவிட்டாலும் அவற்றை நிர்வகிக்க முடியும். இன்னும் கூடுதலாக 2 ஆண்டுகள் கணிதம் படிப்பது நிச்சயமாக சாதகமாக இருக்கும்.

நாணயத்தின் மறுபக்கம் போல, வடிவமைப்பு, இதழியல், உள்ளடக்கம் எழுதுதல், புகைப்படம் எடுத்தல்/திரைப்படம் தயாரித்தல் போன்ற பல்வேறு திறன்களைப் பயன்படுத்தும் தொழில்களுக்கு கணிதம் எங்கும் தேவையில்லை. எண்ணியல் திறன் உங்களுக்கு இங்கு பெரிதும் உதவாது. அத்தகைய தொழிலைத் தொடர்வது பற்றி நீங்கள் உறுதியாக உள்ளீர்கள். எனவே, நீங்கள் கணிதத்தைத் தவிர்க்கலாம்.

கணிதப் பாடம் நிச்சயமாக வெற்றிக்கான ஒரே மூலப்பொருள் அல்ல. எனவே, உங்களின் இலக்கு, தொழில் விருப்பங்கள் குறித்து சரியான தெளிவைப் பெற்று அதற்கேற்ப உங்கள் பாடங்களைத் தீர்மானிப்பதே சரியான முடிவாக இருக்கும்.