IBPS RRB 2026: வங்கி வேலைக்கு விண்ணப்பப் பதிவு இன்று தொடக்கம்.. தகுதி, கடைசி தேதி, முழு விவரங்கள் இதோ!

வங்கியாளர் தேர்வு வாரியம் (IBPS) கிராமப்புற வங்கிகளுக்கான CRP RRBs‑XV அதிகாரி (Officers) மற்றும் அலுவலக உதவியாளர் (Office Assistants) பணியிடங்களுக்கான ஆன்லைன் விண்ணப்பப் பதிவை இன்று (செப்டம்பர் 1) தொடங்கியுள்ளது. இரு பணியிடங்களுக்கும் விண்ணப்பிப்பதற்கான லிங்க் தற்போது ஆக்டிவ்வாக உள்ளது. இதற்கான ஆன்லைன் பதிவு மற்றும் கட்டணம் செலுத்துவதற்கான கால அவகாசம் செப்டம்பர் 1 முதல் செப்டம்பர் 21, 2026 வரை வழங்கப்பட்டுள்ளது. விண்ணப்பங்களைப் பிரிண்ட் எடுப்பதற்கான கடைசி தேதி அக்டோபர் தொடக்கத்தில் முடிகிறது. பதிவுக்கான காலக்கெடு முடிந்ததும் விவரங்களைத் திருத்த முடியாது என்பதால், முன்கூட்டியே விண்ணப்பிப்பது நல்லது. இந்த தேர்வு முகாம் மூலம் மண்டல கிராமப்புற வங்கிகளில் உள்ள ஆபீசர் ஸ்கேல் I, II, III மற்றும் ஆபீஸ் அசிஸ்டெண்ட் பணியிடங்கள் நிரப்பப்பட உள்ளன.

வழக்கமான தேர்வு முறையே இதிலும் பின்பற்றப்படுகிறது. ஆபீஸ் அசிஸ்டெண்ட் மற்றும் ஆபீசர் ஸ்கேல் I பணியிடங்களுக்கு முதல்நிலை (Prelims) மற்றும் முதன்மைத் தேர்வுகள் (Mains) நடத்தப்படும். அதேநேரம், ஆபீசர் ஸ்கேல் II மற்றும் III பணியிடங்களுக்கு ஒரே கட்டத் தேர்வும், அதைத் தொடர்ந்து நேர்காணலும் (Interview) நடைபெறும். வயது வரம்பைப் பொறுத்தவரை: ஆபீஸ் அசிஸ்டெண்ட் (18–28 வயது), ஸ்கேல் I (18–30 வயது), ஸ்கேல் II (21–32 வயது) மற்றும் ஸ்கேல் III (21–40 வயது) என நிர்ணயிக்கப்பட்டுள்ளது. மேலும், தேர்வு செய்யப்படும் மாநிலத்தின் உள்ளூர் மொழியில் தேர்ச்சி பெற்றிருக்க வேண்டியது கட்டாயமாகும்.

IBPS RRB 2026 அறிவிப்பு: முக்கிய தேதிகள் மற்றும் தேர்வு அட்டவணை

IBPS-ன் 2026–27 தேர்வு அட்டவணைப்படி, RRBs‑XV தேர்வுகள் நவம்பர் மாத இறுதியில் தொடங்குகின்றன. ஆபீசர் ஸ்கேல் I முதல்நிலைத் தேர்வுகள் 2026 நவம்பர் 21 மற்றும் 22 ஆகிய தேதிகளில் நடைபெறவுள்ளன. ஆபீஸ் அசிஸ்டெண்ட் முதல்நிலைத் தேர்வுகள் 2026 டிசம்பர் 6, 12 மற்றும் 13 ஆகிய தேதிகளில் நடத்த திட்டமிடப்பட்டுள்ளது. அதிகாரிகளுக்கான முதன்மைத் தேர்வு அல்லது ஒரே கட்டத் தேர்வு 2026 டிசம்பர் 20 அன்று நடைபெறும். தேர்வுகளுக்குப் பிறகு விரைவில் நேர்காணல்கள் நடைபெறும். ஒவ்வொரு கட்டத் தேர்வுக்கும் சில வாரங்களுக்கு முன்பாகவே அட்மிட் கார்டுகள் வெளியாகும் என எதிர்பார்க்கலாம்.

IBPS RRB 2026 அறிவிப்பு: தமிழ் மொழித் தகுதி, காலியிடங்கள் மற்றும் விண்ணப்பிக்கும் வழிமுறைகள்

தமிழகத்தைச் சேர்ந்த தேர்வர்கள் கட்டாயம் தமிழ் மொழியில் திறமை பெற்றிருக்க வேண்டும். தமிழ்நாடு கிராம வங்கி தனது உள்ளூர் மொழியாக தமிழை நிர்ணயித்துள்ளது. பிராந்திய சேவையை ஊக்குவிக்கும் வகையில், RRB தேர்வை 13 பிராந்திய மொழிகளில் எழுத IBPS அனுமதி அளிக்கிறது. வங்கி வாரியான காலியிடங்கள் குறித்த விவரங்களுக்கு அதிகாரப்பூர்வ இணைப்பைச் சரிபார்த்து, உங்கள் மாநிலத்தைக் கவனமாக தேர்வு செய்யவும். ஒதுக்கீடு மற்றும் மொழி விதிகள் மாநிலத்தைச் சார்ந்தவை என்பதால், இவை பணி நியமனத்திலும் தேர்விலும் முக்கிய பங்கு வகிக்கும்.

விண்ணப்பிக்கத் தொடங்குவதற்கு முன் தேவையான ஆவணங்களைத் தயாராக வைத்துக்கொள்ளுங்கள். சமீபத்தில் எடுத்த கலர் புகைப்படம் (200×230 px, 20–50 KB அளவில்), கருப்பு மையால் போடப்பட்ட கையொப்பம் (140×60 px, 10–20 KB அளவில், ஆங்கில பெரிய எழுத்துக்களில் இருக்கக்கூடாது), இடது கை பெருவிரல் ரேகை (20–50 KB) மற்றும் ஆங்கிலத்தில் கருப்பு மையால் கைப்பட எழுதப்பட்ட சுயஉறுதிமொழிப் படிவம் (50–100 KB) ஆகியவை தேவை. விவரங்களைப் பூர்த்தி செய்து, ஆவணங்களை அப்லோட் செய்த பின் சரிபார்த்து (Preview) கட்டணத்தைச் செலுத்தலாம். விண்ணப்பக் கட்டணமாக இதர பிரிவினருக்கு ரூ. 850 மற்றும் SC, ST, PwBD பிரிவினருக்கு ரூ. 175 என நிர்ணயிக்கப்பட்டுள்ளது.

இதற்கான ஆன்லைன் விண்ணப்பப் பதிவு செப்டம்பர் 21, 2026 வரை செயல்படும். ஆபீஸ் அசிஸ்டெண்ட் விண்ணப்பங்களை அக்டோபர் 5 வரையிலும், ஆபீசர் பணியிடங்களுக்கான விண்ணப்பங்களை அக்டோபர் 6 வரையிலும் பிரிண்ட் எடுத்துக்கொள்ளலாம். கடைசி நேரப் பதற்றத்தையும் தவறுகளையும் தவிர்க்க ஆவணங்களை முன்பே சரிபார்த்து, தகுதிகளை உறுதிசெய்து விண்ணப்பத்தைப் பூர்த்தி செய்துவிடுவது நல்லது. இதன் மூலம் நவம்பர்-டிசம்பர் மாதங்களில் நடைபெறும் தேர்வுகளுக்கு முழு கவனத்துடன் தயாராக போதிய நேரம் கிடைக்கும்.