டெல்லி பெற்றோர் கவனத்திற்கு: செப்டம்பர் 11 பள்ளிகளுக்கு விடுமுறை! முழு விவரம் இதோ

டெல்லி பெற்றோர் கவனத்திற்கு! வரும் 2026 செப்டம்பர் 11 வெள்ளிக்கிழமை அன்று, பிரிக்ஸ் (BRICS) உச்சிமாநாடு நடைபெறுவதையொட்டி, கல்வி இயக்ககத்தின் கீழ் இயங்கும் அனைத்து பள்ளிகளுக்கும் விடுமுறை அறிவிக்கப்பட்டுள்ளது. இந்த மாநாட்டிற்கான பாதுகாப்பு மற்றும் போக்குவரத்து ஏற்பாடுகளை கருத்தில் கொண்டு, கல்வி இயக்ககம் மற்றும் பொது நிர்வாகத் துறை ஆகியவை இணைந்து இதற்கான அதிகாரப்பூர்வ சுற்றறிக்கையை வெளியிட்டுள்ளன.

கடந்த செப்டம்பர் 5 அன்று வெளியான அந்த சுற்றறிக்கையில், "கல்வி இயக்ககத்தின் கீழ் வரும் அரசு, அரசு நிதியுதவி பெறும் மற்றும் தனியார் சுயநிதிப் பள்ளிகள் உள்ளிட்ட அனைத்து அலுவலகங்கள் மற்றும் பள்ளிகளுக்கும் 11.09.2026 அன்று விடுமுறை அளிக்கப்படுகிறது" எனக் குறிப்பிடப்பட்டுள்ளது. டெல்லி முழுவதும் இதை முறைப்படி நடைமுறைப்படுத்த பொது நிர்வாகத் துறையின் அறிவிக்கையும் (GAD Notification No. 53/868/GAD/CN/2026/5235-5277) இதனுடன் இணைக்கப்பட்டுள்ளது.

டெல்லி பள்ளி விடுமுறை உத்தரவு யாருக்கெல்லாம் பொருந்தும்?

இந்த விடுமுறை உத்தரவு அரசுப் பள்ளிகள், அரசு உதவிபெறும் பள்ளிகள், அங்கீகரிக்கப்பட்ட தனியார் சுயநிதிப் பள்ளிகள் மற்றும் கல்வி இயக்ககத்தின் அலுவலகங்களுக்குப் பொருந்தும். ஆனால், கல்லூரிகள் மற்றும் பல்கலைக்கழகங்களுக்கு இது நேரடியாகப் பொருந்தாது; அவை தனியாகவே அறிவிக்க வேண்டும். எனவே, டெல்லி பல்கலைக்கழகம், ஐபி பல்கலைக்கழகம் மற்றும் தனியார் பல்கலைக்கழக மாணவர்கள், தங்கள் கல்லூரி நிர்வாகம் அதிகாரப்பூர்வமாக விடுமுறை அறிவிக்கும் வரை காத்திருப்பது நல்லது.

அரசு அலுவலகங்களுக்கு விடுமுறை: பிரிக்ஸ் மாநாட்டு நிபந்தனைகள்

துணைநிலை ஆளுநரின் அறிவிப்பின்படி, டெல்லி தேசிய தலைநகர் பகுதி (NCT) அரசு அலுவலகங்கள், தன்னாட்சி அமைப்புகள் மற்றும் பொதுத்துறை நிறுவனங்களுக்கும் அன்று விடுமுறையாகும். இதுதவிர, மத்திய பணியாளர் மற்றும் பயிற்சித் துறையும் (DoPT), மாநாட்டு ஏற்பாடுகள் மற்றும் பொதுமக்களின் வசதியைக் கருத்தில் கொண்டு செப்டம்பர் 11 அன்று டெல்லியில் உள்ள மத்திய அரசு அலுவலகங்களை மூடுமாறு உத்தரவிட்டுள்ளது. இருப்பினும், அவசர மற்றும் அத்தியாவசிய சேவைகள் வழக்கம்போல இயங்குவதற்கான வழிகாட்டுதல்கள் தனியாக வழங்கப்படும்.

செப்டம்பர் 11 அன்று எதெல்லாம் இயங்கும்? பயணங்களை எவ்வாறு திட்டமிடுவது?

அன்று மக்கள் பயணங்களை முன்கூட்டியே திட்டமிட்டுக்கொள்ளுமாறும், மத்திய டெல்லி பகுதிகளில் போக்குவரத்து மாற்றங்கள் இருக்கும் என்பதால் மெட்ரோ ரயிலைப் பயன்படுத்துமாறும் டெல்லி போக்குவரத்து காவல்துறை கேட்டுக்கொண்டுள்ளது. விவிஐபி (VVIP) வாகனங்களின் போக்குவரத்தின் போது விமான நிலையம் மற்றும் ரயில் நிலையங்களுக்குச் செல்லும் பாதைகளில் கட்டுப்பாடுகள் விதிக்கப்படலாம். எனவே கூடுதல் நேரத்தை ஒதுக்கிப் புறப்படுங்கள்; தடைசெய்யப்பட்ட வழிகளைத் தவிர்க்கவும். லேட்டஸ்ட் நிலவரங்கள் மற்றும் உதவிக்கு 1095 என்ற போக்குவரத்து உதவி எண்ணைத் தொடர்புகொள்ளலாம்.

தேர்வுகள், மதிப்பீடுகள் மற்றும் பள்ளிகள் மீண்டும் திறக்கும் தேதி

செப்டம்பர் 11 அன்று யூனிட் தேர்வு, செய்முறைத் தேர்வு (Practical) அல்லது பிற தேர்வுகள் திட்டமிடப்பட்டிருந்தால், அவற்றுக்கான மாற்றுத் தேதிகளை பள்ளிகள் பின்னர் அறிவிக்கும். உங்களது ஹால் டிக்கெட்டுகளை பத்திரமாக வைத்துக்கொள்ளுங்கள்; மாற்றி அமைக்கப்பட்ட தேதிகளுக்கு வாட்ஸ்அப் குரூப்புகள் அல்லது பள்ளி இணையதளங்களை கவனித்து வாருங்கள். இதர சிறப்பு அறிவிப்புகள் இல்லாத பட்சத்தில், பெரும்பாலான பள்ளிகள் செப்டம்பர் 14, 2026 திங்கட்கிழமை அன்று மீண்டும் வழக்கம்போல் திறக்கப்படும்.

கல்வித் துறையின் சுற்றறிக்கையை பெற்றோர் எப்படி சரிபார்ப்பது?

பள்ளி கல்வித் துறையின் அதிகாரப்பூர்வ இணையதளத்தில் உள்ள 'Circulars' பக்கத்தில், ஒருங்கிணைப்புக் கிளையின் (Co-ordination Branch) கீழ் இந்த சுற்றறிக்கையை சரிபார்க்கலாம். கோப்பு எண் (File number) F. No. 30-3(17)/05/Circular/Coord/2025/154-159 மற்றும் தேதி செப்டம்பர் 5, 2026 என்பதை ஒப்பிட்டுப் பார்த்து, பின்னர் உங்கள் பள்ளியின் அறிவிப்போடு உறுதிப்படுத்திக் கொள்ளுங்கள். பயணங்களைப் பொறுத்தவரை, டெல்லி போக்குவரத்து காவல்துறையின் வழிகாட்டுதல்களைப் பின்பற்றி, வீட்டை விட்டுப் புறப்படுவதற்கு முன் 1095 என்ற எண்ணிற்கு அழைத்து போக்குவரத்து மாற்றங்களைத் தெரிந்துகொள்ளுங்கள்.